KONU :
Tosya’daki Abdurrahman Paşa Vakfı’nın imamı Seyyid Ahmed Halife’nin vefatı
üzerine imamlık cihetinin oğlu Seyyid Osman Halife’ye tevcihine dair berat.
METİN:
Nişân-ı
şerîf-i âlîşân-ı sâmî-mekân-ı sultânî tuğrâ-yı garrâ-yı cihân-sitân-ı hâkânî
hükmü oldur ki;
Tosya’da
vâki‘ müteveffâ Abdurrahman Paşa Vakfı’ndan almak üzere nısf vazife-i muayyene
ile nısf imâmete mutasarrıf olan es-Seyyid Ahmed Halife fevt olup yeri hâlî
olmağla erbâb-ı istihkâkdan sulbu oğlu işbu râfi‘u tevkî‘-i refi‘i’ş-şân-ı
hâkânî es-Seyyid Osman Halife zîde salâhuhu her veçhile mahall u müstehak
olduğunu ve vucûh-ı belde alâ vechi’s-sıhha haber vermeleriyle nısf imâmet
mezbûra babası mahlûlünden oğlu merkûma tevcîh olunup yedine berât-ı şerîf-i
âlîşân verilmek recâsına Tosya Nâibi Mevlânâ es-Seyyid el-Hâc Hasan zîde ilmuhû
arz etmekle mûcebince tevcîh olunmak fermânım olmağın hakkında mezîd-i inâyet-i
pâdişâhanem zuhûra getirip bin yüz doksan sekiz senesi Rebî‘u’l-âhirinin üçüncü
günü târihiyle müverrah verilen ruûs-ı hümâyûn mûcebince bu berât-ı hümâyûn-ı
inâyet-makrûnu verdim ve buyurdum ki; mezbûr es-Seyyid Osman Halîfe zîde
salâhuhû varup babası müteveffâ-yı merkûm yerine vakf-ı mezbûrun nısf imametine
mutasarrıf olup edâ-yı hıdmet eyledikden sonra bundan evvel nısf vazife-i
muayyene ile imâmet-i mezkûra ne veçhile mutasarrıf olagelmişler ise merkûm
dahi ol veçhile nısf vazife-i muayyenesin evkâf mahsûlünden mütevellîsi olanlar
yedinden alıp mutasarrıf ola şöyle bileler alâmet-i şerîfe i‘timâd kılalar
Tahrîran el-yevmi’r-râbi‘
aşar Rebî‘u’l-âhir sene semân ve tis‘în ve mie ve elf
(14.R.1198/7 Mart
1784)
Mahrûsa-i
Kostantınıyye