5-
Mehmet
İzzet Efendi; Cennetmekân Sultan Selim Han-ı Sani
hazretleri türbedarlarından Tosyalı Mustafa Efendi’nin mahdumudur.
Bin
iki yüz kırk sekiz senesi Şaban-ı şerifinin on beşinci günü Dersaadet’te
tevellüt etmiştir.
Sıbyan
mektebinde mukaddime-i ulum ve muahharen Mekteb-i Maarif-i Adliye’de Arabi ve
Farisi ve fenn-i hesap okumuştur. Türkçe kitabet eder.
Bin
iki yüz altmış yedi senesi Saferinin altıncı günü on dokuz yaşında iken bâ
ruus-ı hümayun Maliye Hazinesinde Masarıfat Muhasebesine mülazemetle çerâğ
buyrularak yetmiş iki sene-i Hicriyesi evasıtında yirmi kuruş maaş tahsis ve
yetmiş üç senesi Recebinin on altısında seksen beş kuruş ve yetmiş yedi sene-i
Hicriyesi evailinde yüz kırk beş kuruş zammıyla maaşı iki yüz elli kuruşa iblağ
kılınmıştır. Yetmiş sekiz senesi Rebiu’l-ahirinin on beşinde iki bin kuruş
maaşla Piriştine Fırka-i Askeriyesi için iddihâr olunacak zehayirin umur-ı
hesabiyesine memur olup sene-i merkume Zilhiccesinin ikisinde maaş-ı mezbûr
üzerine binbaşı tayinatı bedeli olmak üzere bin kuruş ilave ile fırka-i mezkure
muhasebe kitabetinde istihdam olunmakta iken yetmiş dokuz senesi Recebinin on
sekizinde fırka-i mezkurenin lağvıyla bedel-i mezkûr kat edilerek kema fi’s-sabık
iki bin kuruş maaşla seksen senesi Cemaziye’l-evvelinin nihayetine değin
fırka-i mezkure muhasebe defterlerinin tahririyle meşgul olup sene-i merkume
Cemaziye’l-ahiresinin on ikisinde yine iki bin kuruş maaşla Üsküp sancağı Mal
Sandığının Umur-ı Hesabiyesi rü’yetine tayin olunmuş ve sene-i mezkure şehr-i
Ramazanının on ikisinde bi’l-istifa maaş-ı sabıkı olan iki yüz elli kuruş ile
muhasebe-i merkumeye avdet ederek maaş-ı mezbûr seksen üç senesi Zilkadesinin
yedisinde südüsünün kat‘ıyla iki yüz sekiz kuruş kalmış ise de seksen dört
senesi Şabanının on yedisinde yüz doksan iki kuruş ve sene-i merkume Şevvalinin
on dokuzunda yüz kuruş ve seksen beş senesi Rebiu’l-evvelinin yirmi dokuzunda
iki yüz kuruş ve seksen altı senesi Saferi gurresinde elli kuruş zamayim
vukuuyla yedi yüz elli kuruşa terakki ve seksen sekiz senesi Recebinin yirmi
sekizinde yüzde beşi kesilerek yedi yüz on kuruşa tenzil eylemiş ve sene-i
merkume şehr-i Ramazan-ı şerifi selhinde kırk kuruş ve seksen dokuz senesi
Rebiu’l-evvelinin beşinde yüz kuruş ilavesiyle sekiz yüz elli kuruşa ve doksan
beş senesi saferinin yirmi birinde Tahrir-i Emlak Kalemine nakil edilip sene-i
merkume Rebiu’l-ahiri evailinde yüz kuruş daha zam edilerek dokuz yüz elli
kuruşa iblağ olunduğu halde sene-i merkume şehr-i Ramazanının on beşinde sekiz
yüz elli kuruş maaş ile Masarıfat-ı Hususiye Muhasebesine memur olarak doksan
altı senesi şehr-i Ramazanının yirmi beşinde ve umum sırasında maaş-ı mezkûr
öşrü bi’t-tenkih yedi yüz altmış beş kuruş kalmış ve doksan yedi senesi Saferi
gurresinde dokuz yüz kuruş maaş ile Masarıfat İdare-i Umumiyesi İkinci Sınıf
Ketebesi silkine bi’l-idhal maaşat odasında selatin ve memurin-i maliye ve ve
mütekaidin-i mülkiye mukayyitliğine tayin ve sene-i merkume Rebiu’l-ahirinin
ikisinde tensik-i maaşat kararnamesi iktizasınca maaşı sekiz yüz kuruşa tenzil
kılınmıştır.
Şimdiye
kadar bulunduğu memuriyetlerde ifa-yı hüsn-i hıdmet ve istikamet edip hakkında
bir taraftan iştika vukuuyla muhakeme tahtına alınmamıştır.
Meclis-i
Maliye Reisi atufetli İbrahim Efendi hazretlerinin Masarıfat İdare-i Umumiyesi
Muhasebeciliği esnada tarafından yazılan mülahazada “Efendi-i muma ileyhin
umur-ı memuresini tesviyede kifayeti görülen âsârıyla müsbittir.” denilmiştir.
Efendi-i
muma ileyhin umur-ı memuresini tesviyede kifayeti balaya yazılan mülahazadan
anlaşıldığı Maliye Nezaret-i Celilesinden terkim olunan 23 Recep sene 98
tarihli zeylde gösterilmiştir.
Fi
25 Rebiu’l-evvel sene 1304 ve fi 15 Kanun-ı Evvel sene 1302
Muma
ileyh Mehmet İzzet Efendi’nin maaşı bin üç yüz senesi Cemaziye’l-ahiresinin
selhinde vaki doksan dokuz senesi Nisanının yirmi altısında dört yüz kuruş
zammıyla bin iki yüz kuruşa iblağ edilerek üç yüz dört senesi Şaban-ı şerifi
gurresine müsadif üç yüz üç senesi Nisanının on üçünde muharreru’l-mikdar maaş
ile Tahsisat-ı Maliye İdaresi Maaşat Şubesi Mütekaidin-i Mülkiye ve Eytamı
Kitabetine nakil edilmiştir.
Efendi-i
muma ileyh bin üç yüz altı senesi Zilhiccesinin on altısında vefat eylemiştir.
