KONU
: Kastamonu’da ziraat ve sanatın geliştirilmesi için Ziraat Müdürünün yol ve
liman yapılması, dut fidanı yetiştiriciliği ve tiftikten mamul üretmek için
nakdi destek ve eğitim isteğinin yerine getirilebilmesi için mahalli
meclislerinin mazbataları ve mutasarrıfların taleplerinin de gerekli olduğuna
dair Ziraat Meclisi’nin mazbatası.
Kastamonu
Sancağı Ziraat Müdürü hâcegândan Ahmed Şükrü Efendi bendeleri tarafından varid
olan bir kıta layiha ve tahrirat Meclis-i Ziraat’de lede’l-kırâe fezleke
mealinde saye-i şevket-vaye-i cenab-ı cihandaride liva-i mezburun istikmal-i
esbab-ı ma‘mûliyetiyle ahalinin husul-i servet ve yesârı zımnında sevahil-i
Bahr-ı Siyah’dan nefs-i Kastamonu’ya karib iskelelerin birine liman ihdas ve tarikinin
tesviyesiyle bazı kazalara cereyan eden nehirlerin icab eden mahallerine
bendler inşa ve harklarının tevsi‘ ve ta‘mîk olunması ve bi’l-ikdâm vücuda getirilmiş
olan harir mahsulünün teksir ve tevfîri için Bursa ve Amasya caniblerinden lüzumu
miktar dut fidanı irsal ve tiftikten masnû‘ sanâyi-i lâzimenin ahaliye li-ecli’t-talim
bir nefer muallim isyâl kılınması ve taife-i ziraatden muhtaç-ı iane olanlara
nizamına tatbikan iane-i nakdiyenin icrası hususlarına müsaade-i seniyye şayan
buyrulması inha ve beyan olunmuş ve bu makule şeyler mevadd-ı matlube-i umrâna
muvafık olarak icra-yı iktizaları lazımeden bulunmuş olmasıyla keyfiyet lede’l-mülahaza
mukaddema mahallinden vaki olan istidaya mebni bâ emirname-i sami Amasya
tarafından bir mikdar dut fidanı celb ettirilerek tutulan numunelere bu defa
vuku bulan iltimasa nazaran harir mahsulünün ol havalide dahi husule geleceği
anlaşılmış olduğundan ber muceb-i inha suret-i teksir ve tevfirine bakılmak
üzere bu defa dahi Bursa ve Amasya caniblerinden liva-i mezbur için taleb
olunacağı mikdar dut fidanının liva-i mezkur tarafından irsal olunacak kesana
fiyat-ı mutedile ile iştira ettirilmesi babında sabıkı vechile Hüdavendigar
Eyaleti Müşiri atufetlü paşa hazretleriyle Amasya Kaymakamı bendelerine tastir
buyrulacak evamirname-i saminin ziraat müdürü muma ileyh kulları tarafına
tisyar ve bir de tiftikden bazı eşya imalinin ahaliye talimi zımnında talep
olunan muallim ne makule sanat erbabından olacağı salifu’z-zikr layiha ve
tahriratda izah ve beyan olunmamış olduğundan bunun dahi izahen tenmîk ve
izbarı hususunun taraf-ı nezaret-i ticaretten kendisine ba tahrirat tavsiye ve
işar olunması iktiza-yı maslahattan olduğu misilli iane-i nakdiye icrası ve
tarik ve liman tesviyesi başlıca ve umuma şümulü ve menfaati râci‘ olur
mevaddan olduğuna ve bunlar mukaddema ba mazbata mahallinden inha ve istida
olunarak henüz cevab-ı alisine destires olunamadığı layiha-i mezkurenin bir
bendinde muharrer ise de meclisçe kayden buna dair bir gûne malumat olmadığına
ve bu makule mevaddın icra-yı tesviyelerine yalnız ziraat müdürlerinin inhası
kafi olmayıp mahalli meclis mazbatasıyla mutasarrıfın-i kiram hazeratının inha
ve işarına mütevakkıf bulunduğuna nazaran bunların mahallince lüzumu olup da
tesviye-i icabı karîn-i müsaade-i âlî buyrulduğu halde ba‘dehu müteallık
buyrulacak irade-i seniyyeye tevfikan icra-yı iktizalarına bakılmak üzere
ibtida-yı emirde hususat-ı meşruhanın mahalli meclisinden başka başka
mazbatalar ile inha olunmak üzere kezalik canib-i nezaret-i ticaretten müdür-i
muma ileyhe beyan ve izbar olunması hususları meclisçe tezekkür olunmuş ise de
hususat-ı mezkure hakkında ne vechile re’y ve tensib buyrulur ise icra-yı
iktizaları menût-i re’y-i âlî idiği muhât-ı ilm-i âlîleri buyruldukda emr ü
ferman hazret-i men lehu’l-emrindir.
Fi
9 M sene [12]63 (28 Aralık 1846)