9-
Hacı
Hüseyin Hüsnü Efendi, Sıbyan Mektebi muallimlerinden Hacı
Fethi-zade Hacı Mehmed Efendi’nin oğludur.
Bin
iki yüz yetmiş altı sene-i hicriyesi evailinde Kastamonu vilayetinde Tosya
kasabasında tevellüt etmiştir. Türkçe kitabet eder.
Bin
üç yüz senesi Zilkadesinin on birinde yirmi dört yaşında iken aidat ile Tosya
kazası Tapu kitabetine memur ve üç yüz bir senesi Zilhiccesinin yirmi ikisinde
munfasıl olup ve ü çyüz senesi Rebiulevvelinin altısında sene-i mezkûr Şevvalinin
onuna kadar yine aidat ile İskilip kazası tahsildarlığında bulunup bu müddette
ceman iki bin otuz dört kuruş otuz dört para aidat almış ve üç yüz dört senesi
Cemaziyelevveli gurresinde üç yüz altı senesi Saferulhayrının dördüne kadar
yine aidat ile Bursa ve şehr-i mezkûrun beşinden sene-i merkuma
Cemaziyelevvelinin yirmi birine değin yine aidat ile Mihalıç kazaları Arazi ve
Emlak Yoklama kitabetlerinde ve yine sene-i mezkure Cemaziyahiresinin on
ikisinden üç yüz yedi senesi Şevvalinin yirmi birine değin yine aidatla Mudanya
Tapu Kitabetinde bolunmuş ve tarih-i mezkurda yedi yüz altmış kuruş maaşla
Kozan sancağı defter-i hakani memuriyetine naklolunmuştur.
Defter-i
Hakani Nezaret-i celilesinden muma ileyhin memuriyet-i hazırasını ifaya
kifayeti tasdik olunmuştur.
Nezaret-i
müşarun ileyhaya ait memuriyetlerinde müddet-i istihdamı sicill-i ahval
şubesinin tezkire-i cevabiyesine melfuf pusulaya İskilip Kazası
Tahsildarlığında müddet-i memuriyeti ile aldığı aidat miktarı Kastamonu
vilayetinin tahrirat-ı cevabiyesine ve Kozan Defter-i Hakani memuriyetine
tarih-i tayin ve miktar-ı maaşını nezaret-i mezkure muhasebesinden tercüme-i
hal varakasına muharrer derkenara tatbik olunmuş ve Rüşdiye Mektebi
şehadetnamesiyle üçüncü sınıf defter-i hakani memuriyetine mahsus
intihabnamesinin suret-i musaddakaları ve tapu ve yoklama kitabetleriyle
tahsildarlıktan beraet-i zimmet ve hüsn-i hıdmetini havi Tosya ve İskilip ve
Mihalıç ve Mudanya kazaları ve Hüdavendigar vilayeti meclis-i idare vilayeti
meclis idarelerinin 18 Teşrin-i Evvel sene 1300 ve 1 Temmuz sene 302 ve 11
Kanun-ı Sani sene 304 ve 14 Şevval sene 1307 ve selh-i Cemaziyelahire sene 1306
tarihli mazbataları tercüme-i hal varakasına merbut bulunmuştur. Fi 4 Safer
sene 310 ve fi 15 Ağustos sene 1308
Muma
ileyhin bin üç yüz dokuz senesi şehr-i Şevval-i şerifinin onunda (25 Nisan
sene1308) maaş-ı halisiyle Hamitabat sancağı Defter-i Hakani memuriyetine nakil
olunmuştur.
Muma
ileyh bin üç yüz on iki senesi Rebiulahirinin yirmi dokuzunda (17 Teşrin-i
Evvel sene 310) yine maaş-ı halisiyle Kayseriye sancağı Defter-i Hakani
memuriyetine nakil olunmuştur.
Muma
ileyh bin üç yüz on üç senesi Şevvalinin yirmi dokuzunda (1 Nisan sene 1312)
maaşıyla Çorum sancağı defter-i hakani memuriyetine nakil olunmuştur.
Muma
ileyhin maaşı bin üç yüz on dört senesi Şevvalinin dokuzunda (1 Mart sene 313) icra
kılınan tenkıhat-ı umumiyede altı yüz seksen dört kuruşa tenzil edildiği
defter-i hakani sicil şubesinin 21 Temmuz sene 313 tarihli vukuat pusulasından
anlaşılmıştır.
Muma
ileyhin mukaddema bin iki yüz doksan altı senesi Şevvali gurresinden (1
Teşrin-i Evvel sene 95) üç yüz senesi Ramazanının yedisine kadar (30 Haziran
sene 99) iki yüz yirmi beş kuruş maaşla Tosya kazası Bidayet Mahkemesi İkinci
Kitabetinde bulunduğu ve zimmet ve ilişiği olmadığı kaza-i mezkûr Bidayet
Mahkemesi heyetinin 30 Teşrin-i Sani sene 314 tarihli mazbatasında gösterildiği
defter-i hakani sicil şubesinin 20 Zilkade sene 316 tarihli vukuat pusulasından
anlaşılmakla ilave-i tezyil kılındı.
Muma
ileyhin 1 Temmuz sene 306 tarihinden 31 Mayıs308 tarihine kadar Kozan ve 1
Haziran sene 308 tarihinden 3 Teşrin-i Evvel sene 310 tarihine kadar Hamitabat
ve 15 Teşrin-i Sani sene 310 tarihinden 15 Mayıs sene 313 tarihine kadar
bulunduğu Kayseriye sancakları defter-i hakani memuriyetlerinden dolayı zimmet
ve ilişiği olmadığı mezkûr livalar meclis idarelerinin 31 Mayıs sene 314 ve 31
Teşrin-i Evvel sene 310 ve 15 Mayıs sene 312 tarihli mazbatalarında
gösterildiği mezkûr 20 Zilkade sene 316 tarihli vukuat pusulasında
gösterilmiştir. Muma ileyhin Kastamonu vilayeti defter-i hakani memuriyetine
nakli hakkında Defter-i Hakani Nezaret-i Celilesinin memurin-i mülkiye
komisyonuna havale buyrulan tezkiresi üzerine kendisinin vilayet-i müşarun
ileyha dâhilinde Tosya’da tevellüt eylediği anlaşılmakla komisyonca evrak-ı
memuriyeti tecviz edilmeyerek açık olduğu anlaşılan Midilli Defter-i Hakani
memuriyetine nakli hakkında bi’l-muhabere nezaret-i müşarun ileyhadan vukubulan
işar ve komisyondan verilen karar üzerine ve bi’l-istizan şeref-sadır olan
irade-i seniyye-i hazret-i padişahi mucebince bin üç yüz on yedi senesi
Zilhiccesinin on yedisinde (4 Nisan sene 316) sekiz yüz on kuruş maaş ile
Midilli sancağı defter-i hakani memuriyetine nakil buyurulmuştur.
Muma
ileyhe vezaif-i memuriyetini ifa eylemekte olmasından naşi bin üç yüz on yedi
senesi Cemaziyelahiresinin yirmi sekizinde rütbe-i salise tevcih buyrulmuştur.
Muma
ileyhin Amasya sancağı defter-i hakani memuriyetiyle becayiş-i memuriyetleri
hakkında vermiş oldukları arzuhal üzerine zaman-ı memuriyetlerine ait cedavil
var ise tanzim ve irsal edildikten sonra hareket etmek ve becayişten sonra nükûl
halinde kabul olunmamak ve harcırah verilmemek şartıyla becayiş encümen-i
nezaretçe kararlaştırıldığı beyanıyla ifa-yı muktezası Defter-i Hakani Nezaret-i
Celilesinin memuriyet-i mülkiye komisyonuna havale buyrulan tezkiresinde
gösterilmiş ve muma ileyhanın icra-yı becayişleri tarafeynin kıza ve
muvafakatına müstenit olduğu suret-i işardan ve mani-i istihdam bir ilişiği
olmadığı tercüme-i halinin tetkikinden anlaşılmış olduğundan ancak nezaretin
kararı dairesinde muamele olunmak üzere ber muceb-i işar tahvil-i memuriyeti
hakkında verilen karar üzerine ve bi’l-istizan şeref-sadır irade-i seniyye-i
hazret-i hilafet-penahi mucebince bin üç yüz on dokuz senesi Şevvalinin on
birinde (8 Kanun-ı Sani sene 317) sekiz yüz on kuruş maaşla Amasya sancağı
defter-i hakani memuriyetine nakil buyurulmuştur.
Saruhan
sancağının elviye-i saireye nazaran cesamet-i muamelatı hasebiyle vazife-i
memuriyetini ifada mesaisi görülen muma ileyhin liva-i mezkûra nakli encümen-i
nezaretin melfuf mazbatasına atfen nezaret-i müşarun ileyhadan vaki olan işar
komisyon-ı mezkûrdan verilen karar üzerine bi’l-istizan şeref-sadır olan
irade-i seniyye-i hazret-i hilafet-penahi mucebince bin üç yüz yirmi iki senesi
Şevvalinin on sekizinde (12 Kanun-ı Evvel sene 320) sekiz yüz kuruş maaşla
Saruhan sancağı defter-i hakani memuriyetine nakil buyurulmuştur.
Defter-i
Hakani memuriyetinde bulunup bir gûna zimmet ve ilişiği olmadığı liva-i mezkûr
meclis idaresinin 25 Kanun-ı Evvel sene 320 tarih ve 135 numaralı Saruhan
Meclis İdaresinin musaddak mazbatası mazbata suret-i musaddakasından
anlaşıldığı Defter-i Hakani Nezaret-i Celilesi sicil şubesinin 4 Teşrin-i Evvel
sene 322 tarihli vukuat pusulasında beyan edilmiştir.
Muma
ileyhin nezaret-i müşarun ileyhadan vaki olan işar ve komisyon-ı mezkûrdan
verilen karar üzerine ve bi’l-istizan şeref-sadır olan irade-i seniyye-i
hazret-i hilafet-penahi mucebince bin üç yüz yirmi beş senesi Muharreminin
yirmi dördünde (24 Şubat sene 322) vuku-ı istifasına mebni yerine diğeri tayin
buyurulmuştur.
Muma
ileyhin bin üç yüz yirmi beş senesi Muharreminin gurresinde (1 Şubat sene 322)
bin kuruş maaşla Dersaadet Senedat Kayıt Kalemi Başkitabetine tayin kılındığı
ve 3 Kanun-ı Sani sene 320 tarihinden (2 Kanun-ı Sani sene 322) tarihine kadar
mukaddema bulunduğu Saruhan ve 11 Haziran sene 316 tarihinden (9 Kanun-ı Sani
sene 317) tarihine kadar Midilli sancakları defter-i hakani memuriyetlerinden
dolayı bir gûne zimmet ve ilişiği olmadığı elviye-i mezkure mecalis idaresinin
22 Kanun-ı Sani sene 322 ve 14 Şubat sene 322 tarihli mezabit suret-i
musaddakalarından anlaşıldığı mezkûr sicil şubesinin 22 Mart sene 324 tarihli
vukuat pusulasında muharrerdir.
