Osmanlı Döneminde Tosyalı Devlet Memurları : 4-Mehmet Rıza Efendi

 TOSYALI DEVLET MEMURLARI -4-

4-      Mehmet Rıza Efendi, asakir-i şâhâne silkinden muhreç Tosyalı Hasan Efendi’nin mahdumudur.

Bin iki yüz elli beş senesi Ramazan-ı şerifinin yirmi altıncı günü Dersaadet’te tevellüt etmiştir.

Sıbyan mektebinde mukaddime-i ulumu ve Bayezid Rüşdiye Mektebinde Arabi ve Farisi okuyup rika ve divani ve reyhani hatlarını ve hesap ve coğrafya fenlerini tahsil eylemiştir. Türkçe kitabet eder.

Bin iki yüz yetmiş sene-i Hicriyesi evailinde on beş yaşında iken Maliye Hazine-i Celilesinde Evamir Kalemine mülazemetle dâhil ve yetmiş üç senesi Rebiu’l-ahirinin on birinci günü on kuruş maaşa nail olup yetmiş dört senesi Recebinin yirmi yedisinde maaş-ı mezkûr üzerine on ve sene-i merkume şehr-i Ramazanının yirmi dokuzunda dahi on ve yetmiş senesi Muharreminin dördünde yine on ve yetmiş altı senesi Cemaziye’l-evvelinin on sekizinde yirmi ve yetmiş yedi senesi Rebiu’l-ahirinin on ikisinde kırk ve yetmiş sekiz senesi Zilkadesinin on dördünde yüz kuruş zam edilerek iki yüz kuruşa baliğ olup işbu kalem maaşını kema kan almak üzere yevm-i mezkûrda tedavülden kaldırılan kavaimin muhasebe kitabetine iki bin kuruş maaşla memur olarak iki mah bu işte bulunduğu gibi seksen senesi Zilhiccesinin altıncı günü kalem maaşı üzerine kırk ve seksen iki senesi Rebiu’l-ahirinin ikisinde yüz altmış ve seksen üç senesi Cemaziye’l-evvelinin üçünde otuz beş ve seksen dört senesi Cemaziye’l-ahiresinin on beşinde üç yüz otuz beş ve seksen beş senesi Rebiu’l-evvelinin yirmi dokuzunda otuz kuruş zam olunarak sekiz yüz kuruşa baliğ olduğu halde seksen senesi Recebinin yirmi sekizinci günü yüzde beş ve saire olarak icra olunan tadilatta yüz yirmi kuruş bi’t-tenzil altı yüz seksen kuruş kalarak doksan senesi şehr-i Ramazan-ı şerifinin yirmi üçünde meblağ-ı mezbûr üzerine yirmi ve doksan iki senesi Zilhiccesinin on altısında yüz ve doksan dört Saferinin on dördünde iki yüz kuruş bi’z-zam bin kuruşa iblağ ile tarih-i mezburda Evamir Mukabeleciliğine tayin olunmuş ve doksan altı senesi şehr-i Ramazan-ı şerifinin yirmi beşinde maaş-ı mezkurun öşrü olan yüz kuruş kesilerek dokuz yüz kuruşa inip doksan yedi senesi Saferinin dahi hazinece icra kılınan ısla[ha]t sırasında meblağ-ı mezbura dört yüz elli kuruş zam ile bin üç yüz elli kuruşa bi’l-iblağ Mektubi-i Maliye Kaleminin Evamir Şubesinde kalmış ve sene-i merkume Rebiu’l-ahirinin ikinci günü umum sırasında yüz elli kuruş dahi tenzil olunarak bin iki yüz kuruş maaşla şube-i mezkurede vazife-i memuriyetini ifa etmekte bulunmuştur.

Şimdiye kadar bulunduğu hizmetler kalemce olup hakkında bir taraftan şikâyet vuku bulmamıştır.

Mektubi-i Maliye saadetli Hilmi Efendi tarafından tercüme-i hal varakasına yazılan mülahazada “Efendi-i muma ileyh kalemce birinci sınıf hülefasından ma‘dûd ve fenn-i inşada malumat ve mahareti ve bir fekk-i matlûb(?) ifa-yı vazife memuriyete muvaffakiyeti meşhûd olmağla tasdik olunur.” denilmiştir.

Efendi-i muma ileyhin derece-i malumat ve ifa-yı vazifece kifayeti balaya yazılan mülahazadan anlaşıldığı Maliye Nezaret-i Celilesinde terkim olunan 14 Rebiu’l-evvel sene 98 tarihli zeylinde gösterilmiştir.

Fi 26 Safer sene 1301 ve fi 15 Kanun-ı Evvel sene 1299

Muma ileyhin bin üç yüz yirmi senesi Recebinin ikisinde fi 21 Eylül sene 1318 sekiz yüz on bir kuruş maaşla tekaüdü icra eylediği Maliye Sicil Şubesinin 28 Teşrin-i Evvel sene 1318 tarihli vukuat pusulasında gösterilmiştir.

Osmanlı Döneminde Tosyalı Devlet Memurları : 3- Mahmut Şevket Efendi

 TOSYALI DEVLET MEMURLARI

3-      Mustafa Şevket Efendi, Ayasofya türbeleri hademesinden Tosyalı müteveffa Hafız Ömer Efendi’nin mahdumudur.

Bin iki yüz otuz iki senesi Muharreminde Dersaadet’te tevellüt eylemiştir.

Mekteb-i sıbyanda mukaddimat-ı ulum-ı diniye ve cami-i şerifte bir miktar Arabi ve Farisi tahsil eylemiştir. Türkçe kitabet eder.

Bin iki yüz kırk üç senesi Zilkadesinde on bir yaşında olduğu halde Atik Bab Defteri aklamından Büyük Ruznamçe Kalemine mülazemetle duhul ve iki yüz kırk yedi senesi Rebiu’l-evvelinde Bab-ı Seraskeride Tımarlı Sipahi Yoklaması Odasına yine mülazemetle nakil ile kırk dokuz senesi Cemaziye’l-evvelisine kadar otuz kuruş maaşa ve tarih-i mezkurda yüz yirmi beş kuruş maaş ve yevmi yarım kıyye lahm ve altı adet nan-ı aziz tayinine nail olmuş ve elli bir senesi Recebine kadar mezkur Süvari Yoklaması Odasında istihdam olunup tarih-i mezkurda yedi yüz elli kuruş maaş ve binbaşı tayinatı ile Kale-i Sultaniye’de bulunan Asakir-i Nizamiye Ondördüncü Alayı Yoklamacılığına ve elli beş tarihinde avdetle yine Yoklama Odasına mülazemet ederek elli yedi senesi Ramazanında üç bin kuruş maaşla Şam ve Halep ve Antep ve Adana ve havalisi Tımarat ve Süvari yoklamacılığına memur ve elli dokuz senesi Cemaziye’l-ahiresinin yirmi beşinci günü hacelik rütbesini bi’l-ihraz altmış senesi evailinde hitam-ı memuriyetle munfasıl olarak o esnada Tımarlı Yoklaması Maliye Maliye Hazinesi Perakende Odasına nakil ve kalp olunmasıyla bir seneye karib müddet oda-i mezkura devam etmiş ve altmış senesi Zilkadesi evailinde bin kuruş maaş ile Tersane-i Amire’de teşkil olunan Polis Meclisi Başkitabetine tayin olunup rütbesi altmış bir senesinde rabiaya ve altmış iki senesinde saliseye terfi ve maaşı altmış üç senesi evasıtında beş yüz kuruşa tenzil ve altmış dört senesi evahirinde iki bin kuruşa iblağ edilmiş ve altmış altı senesi Recebinde heyetçe Bab-ı Zabtiyeye nakil ile maaş-ı mezkur ile İstintak Mümeyyizliğine ve yetmiş bir tarihinde muvakkaten dört bin kuruş maaş ve Miralay tayinatı ile Anadolu Ordu-yı Hümayunu Tahrirat-ı Mühimme Müdürlüğüne memur olup yetmiş iki senesi Cemaziye’l-evvelisinde hizmet-i asliyesine ric‘atle sene-i mezbure Rebiu’l-evvelinde uhdesine saniye sınıf-ı sanisi rütbesi ve Ramazanında dördüncü rütbeden Mecidi Nişanıyla Kars Madalyası tevcih ve ihsan buyrularak yetmiş beş senesine kadar maaş-ı kadimisi olan mezbûr iki bin kuruş ile mezkur İstintak mümeyyizliğinde istihdam olunmuş ve badehu iki bin beş yüz kuruş maaşla İstintak Dairesi Müdürlüğüne ve seksen beş senesi Muharreminde üç bin kuruş maaş ile Divan-ı Zabtiye Azalığına ve sene-i mezkure Şevvalinde dört bin kuruş maaş ile Meclis-i Temyiz Dersaadet Azalığına nakil ile seksen sekiz senesi Şevvalinde maaşı üç bin sekiz yüz kuruşa ve doksan bir Zilhiccesinde iki bin beş yüz kuruşa ve doksan üç senesi Saferinde iki bin yedi yüz elli kuruşa terakki ederek doksan beş senesi Ramazanında iki bin dört yüz yetmiş beş kuruşa inmiş ve doksan altı senesi Rebiu’l-evvelinde iki bin kuruş maaş ile el-haletü hazihi bulunduğu Üsküdar bidayet Mahkemesi Ceza Dairesi Azalığına tayin olunmuştur.

Şimdiye kadar bulunduğu hıdematdan nakil ve tahvil ve ikmal suretleriyle infikak ederek taht-ı muhakemeye alınmamış ve müttehem olmamıştır.

Üsküdar Merkez Bidayet Mahkemesi Ceza Dairesi Reisi izzetli Halil Necip Bey tarafından derç olunan mütalaada efendi-i muma ileyh ashab-ı malumat ve erbab-ı istikametten olup hizmeti meşhûddur denildiği gibi Adliye Nazırı devletli Cevdet Paşa hazretleri tarafından yazılan mütalaada dahi efendi-i muma ileyh hakkında riyasetin işbu şehadeti tasdik olunur denilmiştir.

Fi 10 Cemaziye’l-ahir sene 99 ve fi 17 Nisan sene 98

Muma ileyh Mustafa Şevki Efendi’nin icra-yı teküdünü istida eylemesine mebni tekaüdünün usulü vechile resmen icrası tarihine kadar maaş-ı halisini almak üzere bin üç yüz beş senesi Rebiu’l-evvelinin üçüne müsadif bin üç yüz üç senesi Teşrin-i Sanisinin yedisinde yerine diğeri tayin kılınmıştır.

Efend-i muma ileyhin bin üç yüz beş senesi Şabanının yedisinde vaki binüç yüz dört senesi Nisanının altısında bin beş yüz kuruş maaş ile tekaüdü icra olunmuştur.

Osmanlı Döneminde Tosyalı Devlet Memurları : 2 - Mahmut Fuat Efendi

 TOSYALI DEVLET MEMURLARI

2-      Mahmut Fuat Efendi, Tosyalı-zade Mehmet Emin Bey’in oğludur.

Bin iki yüz kırk iki sene-i Hicriyesinde Eğin’de tevellüt etmiştir.

Sıbyan mektebinde mukaddime-i ulumu bade’t-tahsil muallim-i mahsustan Arabiden Avamil ve Farisiden Gülistan’a kadar okumuştur. Türkçe tekellüm eder.

Bin iki [yüz] altmış sene-i Hicriyesinde on sekiz yaşında olduğu halde Maliye Hazine-i Celilesinin Evamir Odasına mülâzemetle dâhil dört sene sonra kırk kuruş maaşa nail olup tedricen maaşı yüz on kuruşa iblağ olunmuş ve seksen bir senesi Saferu’l-hayrının on üçünde bin iki yüz kuruş maaş ile Malkara kazası Müdürlüğüne ve bin iki yüz seksen bir senesi Rebiu’l-evvelinin yirmi birinde bin yedi yüz elli kuruş maaş ve becayiş sureti ile İnoz kazası Müdürlüğüne memur ve dokuz ay dokuz gün sonra munfasıl olarak seksen dört senesi Muharreminin dokuzunda bin beş yüz kuruş maaş ile Sivas vilayeti dâhilinde kain Darende kazası Müdürlüğüne tayin ve ol aralık hasbe’t-teşkilat kaza-i memur kaymakamlığa tahvil olunduğu halde kendisi maaş-ı mezkur ile ibka olunup iki yüz seksen beş senesi Rebiu’l-ahirinin yedinci günü bin iki yüz elli kuruş maaş ve yine becayiş sureti ile Karahisar-ı Şarki sancağında vaki Suşehri ve seksen altı senesi Saferinin gurresinde miktar-ı mezkur maaş ve kezalik becayiş sureti ile Tonusi ve seksen sekiz senesi Rebiu’l-ahirinin yedisinde yine o miktar maaş ile Gürün kazaları kaymakamlıklarına nakil ve dokuz ay on gün sonra azil olunmuş ve doksan bir senesi Şabanının ahirinde bin üç yüz kuruş maaş ile Aydın sancağına tabi Buldan kazası Kaymakamlığına bi’t-tayin memuriyeti dokuz mah mürurunda bin sekiz yüz kuruş maaş ile Kula Kaymakamlığına ve doksan altı senesi Cemaziye’l-evvelinin ikisinde nısf hesabı üzere dokuz yüz kuruş maaş ile vekaleten Söke Kaymakamlığına tahvil olunarak ve altı buçuk mah sonra munfasıl olmuş ve doksan yedi senesi Şevvalinin on beşinde bin sekiz yüz kuruş maaş ile Muğla Sancağı dâhilinde vaki Mekri Kaymakamlığına memur olduğu halde sene-i merkume Rebiu’l-ahirinin ikisinde tensik-i maâşât kararnamesi hükmünce maaşı bin iki yüz elli kuruşa tenzil ve doksan sekiz senesi Cemaziye’l-ahiresinin yirmi altısında azil olunup el-haletü hazihi mazul bulunmuştur.

Şimdiye kadar bulunduğu memuriyetlerden Mekri Kaymakamlığından maadasından infisali hasbe’l-kader ve becayiş suret ile vukua gelip mezkûr kaymakamlıktan dahi umur-ı memuresince betâatından bahisle azil edilmiş ise de muhakeme tahtına alınmamış ve itham edilmemiştir. Bulunduğu hıdemattan Malkara ve İnöz müdüriyetleri ile Söke kaymakamlığınca hüsn-i hizmet ve Darende kazası ile Mekri ve Suşehri ve Buldan ve Kula ve Tonusi ve Gürün kaymakamlıklarınca beraet-i zimmetini natık Malkara ve maa İpsala [ve] İnöz kazaları ve Sivas vilayeti merkez ve Aydın ve Saruhan ve Menteşe sancakları meclisi idarelerinden ita kılınmış olan gurre-i Rebi’l-ahir sene 82 ve 12 Muharrem sene 83 ve 24 Rebi’l-evvel sene 88 ve 3 Temmuz sene 85 tarihli dört kıta mazbata aynen ve 20 Cemaziye’l-evvel sene 92 ve 24 Zilhicce sene 93 ve 20 Zilhicce sene 96 ve 12 Mayıs sene 97 tarihleriyle muverrah dört kıta mazbatanın dahi Aydın vilayeti meclis idaresinden musaddak suretleri ve Tonusi ve Gürün kaymakamlıklarından zîri mazbatalı ve 25 Safer sene 89 ve 30 Rebiu’l-ahir sene 88 tarihli iki kıta devir muhasebe defteri dahi kezalik aynen sahib-i tercüme tarafından bi’l-irâe komisonca mütalaa olunarak yine kendisine iade edilmiştir.

Fi 3 Muharrem sene 302 ve fi 11 Teşrin-i Evvel sene 300

Muma ileyh Fuat Efendi bin üç yüz üç senesi Şevvalinin yirmi altısında vaki bin üç yüz iki senesi Temmuzunun on altısında bin iki yüz elli kuruş maaş ile Konya vilayeti dâhilinde Aksaray kaymakamlığına tayin olunmuştur.

Efendi-i muma ileyhin memuriyeti bin üç yüz beş senesi Cemaziye’l-ahiresinin yirmisine müsadif bin üç yüz üç senesi Şubatının yirmisinde bin sekiz kuruş maaş ile vilayet-i mezkure muzafatından Yalvaç kazası kaymakamlığına tahvil olunmuştur.

Efendi-i muma ileyh bin üç yüz altı senesi evasıtında irtihal-i dar-ı beka eylemiştir.

Osmanlı Döneminde Tosyalı Devlet Memurları : 1- Bekir Kami Efendi

 TOSYALI DEVLET MEMURLARI

1-      Bekir Kami Efendi, Müezzin müteveffa Mustafa Efendi’nin mahdumudur.

Bin iki yüz yetmiş altı sene-i hicriyesinde Tosya kazasına tabi Kargı nahiyesinin Evrencik karyesinde tevellüd eylemiştir.

Sıbyan mektebinde mukaddime-i ulumu ba‘de’t-tahsîl Enderûn-ı Hümâyûn Mektebine dâhil olup orada kavîaid-i Türkiye ve bir miktar hesap ve coğrafya ve sarf ve nahv-i Arabî ve Divan-ı Hafız’a kadar Farisi okumuştur. Türkçe kitabet eder.

Bin iki yüz doksan sene-i hicriyesinde on dört yaşında olduğu halde yüz kuruş maaş ile Enderûn-ı Hümâyûn hademesi silkine kabul buyrularak doksan dört senesi Rebiu’l-ûlâ gurresinde istifa ile ber vech-i mülâzemet Posta ve Telgraf Nezareti İntihap Komisyonu Kalemine devam eylediği halde doksan dört senesi Recebinin yirmi sekizinde iki yüz elli kuruş maaş ile muvakkaten Sûk-ı Mekâtîb Kalemine memur olup doksan beş senesi Rebiu’l-ûlâ gurresinde sair memuriyet-i muvakkate ile beraber açığa çıkarılmış ve sene-i merkume Recebinin yirmi altısında yine iki yüz elli kuruş maaş ile kalem-i mezbura memuriyeti vuku bularak maaşı doksan altı senesi şehr-i Ramazanının yirmi beşinde ve umum sıra ında iki yüz yirmi beş kuruşa ve doksan yedi senesi Rebiu’l-ahirinin ikisinde iki yüz kuruşa tenzil ve doksan sekiz senesi Muharreminin on yedisinde üç yüz kuruş zam ile beş yüz kuruşa bi’l-iblağ Mabeyn-i Hümayun Telgrafhanesine naklolunmuş ve sene-i merkume Rebiu’l-evvelinin dokuzunda yine mezkûr maaş ve becayiş sureti ile kalem-i mezbura ricat ederek doksan douz senesi Recebinin on dördünde Kastamonu vilayetince nefs-i Kastamonu sancağı Sertahsildarlığına intihap ve tayin olunmakla sene-i mezbure Ramazan-ı şerifinin ikisinde kalem-i mezburdan istifa ile memuriyetine azimet ve işe mübaşeret eylemiş ise de vergi emanetince memuriyeti tasdik olunmayarak yerine diğeri tayin ve irsal kılınmasına mebni bin üç yüz senesi Saferinin sekizinde mezkûr Sertahsildarlıktan infikâk ve Dersaadet’e avdet ve bin üç yüz senesi Recebi selhinde emânet-i müşârun ileyhaca aidat-ı mukannenesi ile Aydın vilayeti dâhilinde kâin Denizli sancağı Sertahsildarlığına tayin olunmuş ise de kable’l-azime yani sene-i merkume Ramazan-ı şerifinin altısında memuriyeti Bolu sancağı sertahsildarlığına tahvil olunarak merkez vilayete azimet eylediği halde kendisi vilayetçe sene-i merkume Şevvali ibtidasında Zağfiranbolu kazası kaymakamı ile mal müdürü hakkında bazı tahkikat icrası memuriyet-i muvakkatasıyla mahall-i mezkûra izam ve şehr-i mezkûrun yirmi üçünde nısf maaşı olan sekiz yüz yetmiş beş kuruş ile kaza-i mezkûr kaymakamlığı vekâleti dahi uhdesine ihale olunup dört mah iki gün mürurunda kaymakam-ı sabıkın iadesiyle açıkta kalarak bin üç yüz senesi Rebiu’l-evvelinin dördündü altı yüz yetmiş beş kuruş maaş ile vilayet-i mezkure mektupçu odası mümeyyizliğine tayin ve üç yüz iki senesi Muharreminin on dokuzunda memuriyeti bin kuruş maaş ile Bolu Tahrirat Müdürlüğüne tahvil olunmuştur.

Şimdiye kadar bulunduğu memuriyetlerden infisali terakki ve istifa ve hitam ve tahvil-i memuriyet suretleriyle vukua gelip umur-ı memuresinden naşi taht-ı muhakemeye alınmamış ve müttehem olmamıştır.

Bolu sancağı mutasarrıfı saadetlü İsmail Kemal Bey tarafından derç olunan mütalaada mündericat-ı varaka tasdik olunduğu misilli Kastamonu valisi ebhetlü devletlü Abdurrahman Paşa hazretleri canibinden dahi kaidesine itbaan tasdik olundu denilmiştir.

Muma ileyhin ber minvâl-i muharrer bulunduğu Telgraf memuriyetinden infikâki istifasına mebni olup bir gûne zimmet ve ilişiği olmadığını müş‘ir Posta ve Telgraf Nezaret-i aliyyesinden kendisine hitaben yazılan 15 Ağustos sene [12]98 (27 Ağustos 1882) tarihli ve yetmiş dört numaralı bir kıta tahrirat-ı resmiye ile Kastamonu Sertahsildarlığı İdaresi müddetince makbuzatı olup da bilahere pusula ve ilmühaberi zuhur ederse hakk-ı zımân ve mesuliyeti kendisine ait olmak üzere beraat-ı zimmetine dair Kastamonu Meclisi İdaresinin 28 Kanun-ı Sani sene 300 (9 Şubat 1885) tarihli bir kıta mazbatası ve Zağferanbolu Kaymakamlığı vekaleti müddet-i idaresinde emval-i emiriyeden bir gûne zimmet ve ilişiği olmadığını müşir ve kaza-i mezkur heyet-i idaresi ile meclis-i idare-i vilayet tarafından musaddak devr-i muhasebe defteri muma ileyh tarafından komisyona bi’l-irâe kendisine iade olunmuştur.

Efendi-i muma ileyh Dersaadet’e gelerek bi’l-imtihan bin üç yüz üç senesi şehr-i Şabani’l-muazzamının yirmi dokuzunda bin iki yüz elli kuruş maaş ile Kastamonu vilayeti muzâfâtından Göynük kazası kaymakamlığına tayin ve bin üç yüz altı senesi Cemaziye’l-ahiresinin yirmi dördünde uhdesine rütbe-i salise tevcih buyrularak bin üç yüz yedi senesi şehr-i Receb-i şerifinin on dördünde maaş-ı halisiyle vilayet-i müşârun ileyha mülhakatından Hamidiye kazası kaymakamlığına nakledilmiştir.

Muma ileyhe bin üç yüz sekiz senesi şehr-i Receb-i şerifinin yirmi dokuzunda dördüncü rütbeden mecidi nişan-ı zişanı ile ihsan buyrulmuştur.

Muma ileyhin aleyhine Reji Memuru Tekfur Efendi tarafından ikame olunan iştika ani’l-hükkam davasına dair memur-ı muma ileyh tarafından verilip Bolu mutasarrıflığından gönderilen iki kıta arzuhal üzerine Şura-yı Devlet Dâhiliye Dairesinin Dâhiliye Nezaret-i Celileden 13 M sene 1310 tarihli tezkire ile Sicill-i Ahval Daire-i Umumiyesine tevdi kılınan mazbatasında müşteki-i merkumun hülasa-i iddiası müstantık tarafından men-i muhakeme kararı verilmiş iken kaymakam-ı muma ileyh reis-i mahkeme sıfatıyla lüzum-ı muhakeme kararı verilmek üzere iade eylemesi ve kararnamenin yirmi dört saat zarfında makam-ı riyasetten tasdik veya iade olunması Adliye Nezaretinin tebligat-ı umumiyesi iktizasından olduğu halde altı yedi gün sonra müstantıklığa iade eylemesinden ibaret olarak iştikanın müstenid olduğu tebligat-ı mesrûde hükm-i nizam kuvvetini haiz olmamasına ve bu misilli kararların tastik olunup olunmaması rüesanın takdirine muallak bulunmasına ve esasen zikrolunan kararname kaymakam tarafından kasden tevkif olunmayıp livaya gönderilerek tekrar iade suretiyle müddetin mürur eylediği gösterilmiştir.

Muma ileyh bin üç yüz dokuz senesi Cemaziye’l-evvelinin yirmi ikisinde 11 Kanun-ı Evvel sene 307 işten el çektirilip sene-i merkume Zi’l-kadesinin dokuzunda 23 Mayıs sene 308 iade-i memuriyet eylediği Kastamonu vilayetinin 18 Ca sene 310 tarihli tahriratına matvî(?) muhasebe-i vilayetin 25 Teşrin-i Sani sene 308 tarihli derkenarında gösterilmiştir.

Muma ileyh mervi olan su-i ahvali hakkında Şura-yı Devletçe tetkikat neticesinde mucib-i mesuliyet bir hali görülememesinden naşi mahall-i memuriyetine avdetle ifa-yı vazifeye mübaşeret etmiş ise de müştekilerin sükûn ve iltiyâmını icap edecek bir tarz-ı idare tutamamasına mebni yeniden bir takım ihtilâfât ve iğtişâşât zuhur etmiş olduğu canib-i vilayetten işar olunmasına binaen bin üç yüz dokuz senesi Zi’l-hiccesinin yirmi dördünde 6 Temmuz sene 308 maaş-ı halisiyle vilayet-i mezburede Taşköprü kazası kaymakamlığına nakledilmiştir.

Muma ileyh bin üç yüz on bir senesi sşehr-i Receb-i şerifinin yirmi beşinde 20 Kanun-ı Sani sene 309 bin yedi yüz elli kuruş maaşla Edirne vilayetinde Vize kaymakamlığına nakil buyrulmuştur.

Muma ileyhe vazife-i memuriyetini hüsn-i ifada gayret ve mesaisi cihetiyle bin üç yüz on bir senesi Zi’l-hiccesinin on yedisinde terfian rütbe-i saniye sınıf-ı sanisi tevcih buyrulmuştur.

Muma ileyh istidası üzerine bin üç yüz on iki senesi Rebiu’l-ûlâ gurresinde 21 Ağustos sene 310 bin yedi yüz elli kuruş maaşla ve becayiş suretiyle Kastamonu vilayetinde Bartın kazası kaymakamlığına nakil buyrulmuştur.

Muma ileyhin Bolu sancağı Tahrirat Müdüriyetinde iken mefsuh intihab-ı memuriyin komisyonunca imtihanı bi’l-icra 12 Nisan sene 302 tarih ve yirmi altı numaralı üçüncü sınıf kaymakamlık intihapnamesi ahz eylediği Memuriyet Kalemi Müdüriyetinin 24 Mart sene 315 tarihli müzekkiresinde gösterilmiştir.

Muma ileyhe Hamdiye kaymakamlığında iken bin üç yüz sekiz senesi Recebinin altısında Gümüş İmtiyaz Madalyası ihsan buyrulduğu komisyonunca bade’l-mütalaa iade edilen Berat-ı Hümayundan anlaşılmıştır.

Muma ileyhe vezaif-i memuriyetini hüsn-i ifa eylemekte olmasından naşi bin üç yüz on beş senesi Ramazanının on yedisinde terfian rütbe-i saniye sınıf-ı mütemaziyesi tevcih buyrulmuştur.

Muma ileyhin 10 Haziran sene 1302 tarihinden 9 Mart 306 tarihine kadar bulunduğu Göynük kaymakamlığında İzmit’ten Ankara’ya müntehi tarik-i kebirin inşaatında ve iane-i ahali ile yirmi dört odalı kargir hükümet konağı ve tahtanisi altı bab dükkân mekteb-i ibtidâi ve kargir gaz deposu ve Akşemsettin hazretlerinin dergâh-ı şerifleri postnişinine mahsus daire ve köprü ve saire inşaatında gayreti görüldüğü ve vazifesini hüsn-i ifa edip emval-i emiriye ve hukuk-ı şahsiyeden zimmet ve ilişiği olmadığı kaza-i mezkûr meclisi idaresinin mazbatasında beyan ve Bolu sancağı meclisi idaresinin 10 Mart sene 306 tarihli mazbata-i müzeyyilesinde hıdemât-ı mebrûrede bulunduğu ve beraat-i zimmeti tastik edilmiştir.

Muma ileyhin 1 Ağustos sene 308 tarihinden 28 Kanun-ı Sani sene 309 tarihine kadar Taşköprü kaymakamlığında bulunarak bir gûne zimmet ve ilişiği olmayıp emval-i umumiye-i tahsilatıyla hükümet konağı ve iki bab kargir mağaza ve mükemmel bir daire-i belediye ve Taş Cami-i Şerif avlusuna mermerden gayet metin şadırvan ve çarşı içinde yangın duvarları inşaatında ve alat ve edevat-ı itfaiyenin ıslah-ı mevcudiyetine tezyidi emrinde gayret ve ikdam-ı fevkaladesi müşahade edildiği kaza-i mezkûr meclisi idaresinin mazbatasına atfen Kastamonu vilayeti meclisi idaresinin 31 Kanun-ı Sani sene 309 tarihli mazbatasında gösterilmiştir.

Muma ileyhin 28 Şubat sene 309 tarihinden 9 Eylül sene 310 tarihine kadar bulunduğu Vize kaymakamlığından emval-i emiriye ve hukuk-ı şahsiyeden zimmet ve ilişiği olmayıp ifa-yı hüsn-i hizmet ve iane-i ahali ile kargir maa hapishane bir jandarma dairesi tesisi ve inşasında ve emval-i umumiyenin tahsilinde gayreti görüldüğü kaza-i mezkûr meclisi idaresinin mazbatasında beyan ve Kırkkilise sancağı meclisi idaresinin 13 Eylül sene 310 tarihli mazbata-i müzeyyilesinde muma ileyhin muvaffakiyeti livaca da musaddak idiği dermiyan olunup mezabıt-ı mezkure ile mefsuh intihab-ı memurin komisyonunun 23 Kanun-ı Sani sene 304 tarihli ve iki yüz yirmi dört numaralı ikinci sınıf kaymakamlık intihapnamesi komisyonca bade’l-mütalaa iade edilmiştir.

Niğde Mutasarrıflığına iktidar ve ceziresi(?) cihetiyle icra-yı memuriyeti Konya vilayetinden alınan melfuf telgrafnamede beyan olunan muma ileyh ile mutasarrıflık vazifesini ifaya iktidarı anlaşıldığı müfettiş devletlü Şakir Paşa hazretlerinin işarına atfen tezkire-i samiye-i sadaretpenahi ile izbar buyrulan Bayburt Kaymakamı Hüsnü ve bir mutasarrıflığa tayini emr-i sâmî iktizasından bulunan Gebze Kaymakamı Hasan Hüsnü beylerden tercihen tayini hakkında Dahiliye Nezaret-i Celilesini tezkiresi üzerine komisyonca muma ileyhimin tercüme-i hallerinin tetkikinden sonra cereyan eden müzakere neticesinde azadan İzzettin Bey tarafından muma ileyhimin hiç birinin şayan-ı terakki görülemediğinden liva-i mezkur mutasarrıflığına ya mutasarrıf mazullerinden münasibinin yahut kaymakamlıkta müstehakk-ı terakki olanlardan birinin intihabı beyan olunmuş ve Muhyiddin Efendi dahi devlet ve memlekete hıdemat-ı sadıkane ve müstakimane ibrazına iktidar ve ehliyet izhar eylemiş memur yetiştirmek maksad-ı alisiyle tesis buyrulmuş olan zat-ı şevket-meâb-ı hazret-i padişahinin bilhassa himaye-i şahaneleri tahtında bulunan mekteb-i mülkiye-i şahaneden neşet edip el-yevm birinci sınıf kaza kaymakamlıklarında bulunan ve mutasarrıflığa kesb-i istihkak eyleyenlerin terfian ve tercihen tayini lüzumu bedîhî olup ancak nezaret-i müşârun ileyhanın tezkiresinde buna dair sarahat olmamasına ve muma ileyh Kâmî Efendi’nin dahi mani-i istihdam ahvali görülememesine nazaran muma ileyhin tasdik-i memuriyeti re’yinde bulunmuş olmasına ve nezaret-i müşârun ileyhaca intihap olunan zevat-ı muma ileyhimin her birinin tercüme-i hallerinden mani-i istihdam bir ilişikleri olmayıp bunlardan muma ileyh Kâmî Efendi mukaddema dahi Nevşehir kaymakamı Muhlis ve Avlonya Kaymakamı Hayri efendilerle beraber mutasarrıflığa intihap olunması üzerine komisyondan tanzim ve takdim kılınan mazbatada muma ileyhimin her biri derece derece terfia müstehak oldukları tasdik ile ahiren Muhlis ve Hayri Efendiler birer mutasarrıflığa intihap ve bu karara binaen memuriyetleri tasdik olunarak muma ileyh Bekir Kâmî Efendi’nin dahi iktidar ceziresi cihetiyle bu kerre Niğde Mutasarrıflığına tayini Konya vilayetinden işar ve nezaret-i müşârun ileyhaca tekrar intihap edildiğinden ve tercüme-i halinde mani-i istihdam bir kayıt bulunmamış olduğu cihetle redd-i intihaba sebep görülemediğine ve kendisinin ahliyet ve iktidarı dahi tahkik kılındığına binaen muma ileyhin dahi kararı emsali ve vilayet ve nezaret-i müşârun ileyhanın işarı veçhile tasdik-i memuriyeti hususuna ekseriyetle karar verilmiş ve bi’l-istizan şeref-sadır olan irade-i seniyye-i hazret-i hilafet-penahi mûcebince bin üç yüz on altı senesi Zi’l-kadesinin on dokuzunda 19 Mart sene 315 dört bin beş yüz kuruş maaşla Niğde mutasarrıflığına tayin buyrulmuştur.

Muma ileyhe sene-i merkume Zi’l-hiccesinin on dördünde terfian rütbe-i ûlâ sınıf-ı sânîsi tevcih ve üçüncü rütbeden nişân-ı âlî-i Osmânî ihsan buyrulmuştur.

Muma ileyhe vezaif-i memuriyetini mukdimâne ifa eylemekte olmasına mebni bin üç yüz on yedi senesi Ramazan-ı şerifi gurresinde ikinci rütbeden Mecidi Nişan-ı zişanı ihsan olunmuştur.

Muma ileyhin mukaddema 13 Mart sene 306 tarihinden 30 Haziran sene 308 tarihine kadar Hamidiye ve 2 Teşrin-i Evvel sene 310 tarihinden 19 Mart sene 315 tarihine kadar Bartın kaymakamlıklarında bulunarak Hamidiye’de birçok âsâr-ı hayriye ve nafia vücuda getirdiği ve Bartın’da iânât ile mükemmel bir hükümet konağı ve mekteb-i rüşdiye ile mekâtib-i ibtidâiye maaşatına karşılık almak üzere tahtânî ve fevkânî kargir bir bina ve kaldırım yaptırdığı ve tekaüt sandığı aidatıyla tevkifat-ı (…) ve zimmet-i emiriye ve hukuk-ı şahsiyeden ilişiği bulunmadığı mezkûr kazalar meclis idarelerinin iki kıta mazbatasında beyan olunmuş ve fi’l-hakika muma ileyh vezaif-i muhimmeyi hüsn-i ifa ile isbat-ı asar-ı rü’yet eylediği livaca da malum bulunduğu Bolu sancağı meclis idaresinin komisyonca bade’l-mütalaa iade edilen 14 Teşrin-i Sani sene 315 tarihli mazbatasında gösterilmiştir.

Muma ileyh bin üç yüz on sekiz senesi Rebiu’l-ahirinin yirmi beşinde 8 Ağustos sene 316 beş bin kuruş maaşla Şehremaneti Meclis Azalığına tayin buyrulmuştur.

Muma ileyhe hidemât-ı memdûhasına mebni sene-i merkume Cemaziye’l-ahiresinin yirmi ikisinde tebdilen ikinci rütbeden nişan-ı âlî-i Osmani ihsan buyrulmuştur.

Muma ileyhin 21 Nisan sene 315 tarihinden 12 Ağustos sene 316 tarihine kadar mukaddema bulunduğu Niğde sancağı mutasarrıflığında umûr ve muamelât-ı hükümetin merdî-i âlî dairesinde hüsn-i temşiyeti ve mesarif ve mekatibin tamim ve ıslahı ve inşaat-ı nafianın temin-i terfisi hususatında pek çok âsâr-ı faaliyet ve muvaffakiyeti görüldüğü ve ianeten inşaatına başlanılmış olan Niğde ve Bor hükümet konaklarının ikmaline muvaffak olup emval-i emiriyyeden ve tekaüt sandığına ait tevkifattan bir gûne zimmeti olmadığı Dâhiliye Nezaret-i Celilesinden ba tezkire irsal kılınan Konya vilayet-i celilesinin 16 Ağustos sene 316 tarihli tahriratıyla zîri vilayet-i müşârun ileyha meclis idaresinden musaddak Niğde sancağı meclisi idaresinin komisyonca bade’l-mütalaa iade edilen 23 Ağustos sene 316 mazbatasında gösterilmiştir.

Müşârun ileyhe Niğde Mutasarrıflığında hüsn-i hizmeti ve kemal-i sadakati müşahede olunmuş ve hizmet-i hazırasında dahi mesai-i cemile ve sadıkası sebk etmekte bulunmuş olmasına mebni bin üç yüz yirmi senesi Zi’l-kadesinin on sekizinde terfian rütbe-i ûlâ sınıf-ı ûlâ tevcih buyrulmuştur.

Müşârun ileyh bi’l-istizan şeref-sadır olan irade-i seniyye-i hazret-i hilafet-penahi mûcebince bin üç yüz yirmi bir senesi Saferinin on üçünde 28 Nisan sene 319 beş bin kuruş maaşla Şura-yı Devlet Azalığına nakil buyrulmuştur.

Tahrir ve Vergi İdaresinin Defter-i Hakani Nezaret-i Celilesine iade-i irtibatı ve Dersaadet emlak ve vergi-yi bakayasının suret-i saiyede tahsili hususatıyla teferruatını tedkik eylemek üzere teşkili mukteza-yı irade-i seniyye-i hazret-i hilafet-penahiden olan komisyona müşârun ileyhin memur buyrulduğu Maliye Nezaret-i Celilesinden Şehremanet-i Celilesine yazılan 24 Şaban sene 319 tarihli tezkirede gösterilmiştir.

Müşârun ileyhe ba-irade-i seniyye-i hazret-i padişahi bin üç yüz yirmi bir senesi Şevvalinin yirmi dokuzunda 5 Kanun-ı Sani sene 319 iki bin beş yüz kuruş maaşla Ziraat Bankası Riyaseti memuriyetine ilave buyrulmuştur.

Müşârun ileyhe mesai-i hasene ve memduhasına binaen bin üç yüz yirmi bir senesi Şevvalinin üçünde tebdilen birinci rütbeden Mecidi N işan-ı Zişanı ihsan buyrulduğu komisyonca bade’l-mütalaa iade berat-ı hümayundan anlaşılmıştır.

Müşârun ileyhe bin üç yüz yirmi dört senesi Şevvalinin üçünde terfian rütbe-i bâlâ tevcih buyrulmuştur.

Müşârun ileyh bin üç yüz yirmi altı senesi Şabanının altısında 20 Ağostus sene 324 Şura-yı Devletin icra kılının tensikatında kadro harici kalmıştır.