Günümüzde olan Tosya'nın çevre il ve ilçelere olan yol talepleri ta Osmanlı Döneminden itibaren gelmekte olup Tosya-Taşköprü yolunun yapımı ile ilgili bir kaç belgeyi hemşehrilerimizin dikkatine sunuyorum.
KONU:
İnebolu,
Daday, Taşköprü ve Tosya kazaları yollarının yapımına dair Kastamonu
valiliğinin tahriratı.
METİN:
Ticâret
ve Nâfia Nezâret-i Celîlesine
Dâhil-i
vilayetdeki yolların inşası mebâliğ-i külliyeye muhtâc ve binâen alâ zâlik bu
sene mezkûr yolların en mühimmi olan İnebolu tarikinin yapdırılması elzem
olduğundan bahisle
Yalnız
merkez sancağı bakâyâsından elde edilecek mebâliğ-i nakdiye inşâât-ı sanâyia
ile âlât ve edevât masârıf-ı zarûriyesine ve me’mûrîn-i fenniye maâşâtına ve
müteahhide ihâle olunan kısmının masârıf-ı inşâiyesine hasr edilmek ve diğer
livâlar dâhilindeki iʻmâlât masârıfına dahi kendilerinin bakâyâsı karşılık
tutulmak üzere merkez sancağına mülhak Daday, Cide, Taşköprü, Tosya kazaları
dâhilindeki inşââtın bi’z-zarûre gelecek seneye terkiyle beraber amele-i
mükellefesinden bedel-i nakdî alınmakdan sarf-ı nazar olunarak bunların ve
bedel-i şahsîlerinin İnebolu yoluna sevkiyle çalışdırılmaları ve vilâyetin
sancaklarına âid yolların da lede’l-hâce bu suretle yapdırılması münâsib
olacağına dair bazı ifâdâtı hâvî Kastamonu Vilâyet-i Celîlesinden mebʻûs 4 Zi’l-hicce
sene 320 târîhli ve 67 numaralı tahrîrât leffen savb-ı sâmîlerine isyâl
olunmağla ve melfûfun iâdesine himmet.
Bâ işâret-i aliyye-i müsteşârî
1320.Z.17/1903
Mart 17
KONU:
Tosya
kazası ile Taşköprü yolu üzerinde bulunan tepenin tesviyesi.
METİN:
Huzur-ı
Âlî-i Cenâb-ı Sadâret-penâhîye
Maʻrûz-ı
kullarıdır;
Kastamonu
vilâyetine merbût Taşköprü kasabasının cihet-i cenûbîsinde bir sâat mesâfede
Tosya kazasıyla Taşköprü tarîkı üzerinde vâkiʻ iki kilometre tûlünde irtifâʻ ve
baʻzı avârızı bulunan Salât Yeri denilen tepenin ezher cihet mâniʻ-i murûr
olduğu tarîk üzerinde bir sed hâil bulunduğu ecilden civârında bulunduğumuz
yüzü mütecâviz karye ahâlîsiyle Tosya yolcularının murûr ve ubûrlarını ve
nakliyâtı işkâl eylediğinden ve o civârda başka tarik olmamasından dolayı
ihtiyâc sebeiyle çend sene mukaddem hükûmet-i mahalliyenin muâvenet-ı
teshîlât-kârîsiyle civârımız kurâ ahâlîsine bir mikdâr ameliyât ve tesviye icrâ
itdirilmiş ise de ameliyât-ı vâkıa müşkilât-ı maʻrûzayı defʻ matlûb derecede te’mîn
itmediğinden ve murûr-ı zamânla sel yıkındısı ve çökmek gibi mâniʻ-i murûr
ârızalar husûlüyle de murûr ve nakliyât bir kat daha güçleşdiğinden mahall-i
mezkûrdan esnâ-yı mürurda araba ve hayvânât ve sâire telef ve ziyâa uğrayarak
bu yüzden kesretle zarar vukûa gelmekde olup hâlbuki ahâlîmizin yedlerindeki
âlât ve edevât orada ameliyât icrasına müsâid olmadığı ve kifâyet itmediği gibi
istiʻmâl dahi idilemeyerek bu bâbda sarf olunacak mesâî fâide itmemekde
olmasına ve bu nevʻ ameliyât-ı cesîme kudretimiz fevkinde bulunmasına ve iki
yüz nefer amele ile beş altı gün zarfında murûra müsâid derecede tesviyesi
imkânına binâen ol mikdâr amelenin karyelerimiz bedelât-ı nakdî bakâyâsından
borcu olanların ve yâhûd sene-i hâliye bedelât-ı nakdiyesinden
mükellefiyetlerini mahall-i mezkûrda bedenen îfâ itmek sûretiyle nâfia
dâiresince mahalli- mezkûrun tesviye itdirilmesi ve itmâmına değin tensîb
buyrulacak birkaç gün bi’r-rızâ fazlaca da ameliyâtda çalışmağı dahi taahhüden
müşkilât ve ihtiyâcımızın defʻ ve te’mîni husûsunu istirhâm ve sâye-i maʻmûriyet-vâye-i
hazret-i pâdişâhîde memleketimizi dahi bu sûretle esbâb-ı ticâret ve umrânının
istikmâli zımnında makâm-ı âlîlerinden arz ve takdîm olunmak üzere işbu istidʻâ
tanzim ve takdîm kılındı ol bâbda emr ü fermân hazret-i veliyyi’l-emrindir.
25
Haziran 324/1908 Temmuz 8
Civar köyler, muhtar, imam ve
azalarının imza ve mühürleri
Kastamonu
Vilâyet-i Behiyyesine Tahrîrât
Tosya
kazasıyla Taşköprü tarîkı üzerinde vâkiʻ iki kilometre tûlündeki tepenin murûr
ve ubûra mâniʻ olmakda bulunduğundan bahisle mahall-i mezkûrun tesviye
itdirilmesi hakkında baʻzı ifâde ve istidʻâyı hâvî gelen arzuhâlin bir sûreti leffen
savb-ı atûfîlerine gönderilmiş olmağla meâline nazaran îcâb-ı hâlin îfâsına
himmet.
30
Haziran 1324/1908 Temmuz 13
Bâ işâret-i aliyye-i hazret-i
müsteşârî
KONU:
Taşköprü-Tosya
yolunun tamirine dair ahali adına verilen arzuhalinin gönderildiği, gereğinin
yapılması.
METİN:
Ticâret
ve Nâfia Nezâret-i Aliyyesine
Karyelerine
müntehî Taşköprü Tosya tarîkının Salât Yeri nâm mahallinin saʻbu’l-murûr
olmasından dolayı dûçâr-ı müşkilât olmakda bulunduklarından bahisle mezkûr tarîkın
taʻmîri istidʻâsına dâir Taşköprü kazasına tâbiʻ Abdal Hasan Tekyesi ahâlîsi
nâmına Hüsnü imzâsıyla virilen arzuhâl leffen savb-ı atûfîlerine gönderilmekle
iktizâsının îfâsına himmet
21
Muharrem 323/30 Kânûn-ı Sânî 324/12 Şubat 1909
Bâ işâret-i müsteşârî
Hiç yorum yok:
Yorum Gönder